عدد الرسائل : 106 العمر : 45 الموقع : شبعانة قبلى اوسمه : تاريخ التسجيل : 28/05/2008
موضوع: سيرة تعريفية الشاعر عبدالعال السيد الخميس 3 يوليو - 15:26
من مواليد قرية شبعانة شمال القولد المؤهل التعليمى / بكالريوس ادارة أعمال / جامعة القاهرة / الفرع بلد الاقامة والعمل الذى يمتهنه / المملكة العربية السعودية / جدة ويعمل فى المطبخ الصحفى بجريدة عكاظ السعودية * وله مجموعة قصصية غير مطبوعة كاتب عمود مرصد بجريدة الخرطوم * تغنى له الكثير من المطربين السودانيين أمثال مصطفى سيد أحمد * ابو عركى البخيت * الهادى الجبل عصام محمد نور * سيف الجامعة * كمال ترباس ويعد عبد العال السيد من كبار الشعراء المبدعين والتحية للطير المهاجر ود السيد
موال على درب النخيل
سنة أربعين فى قرية في جوف الشمال كانت بيوتها مشتتة وكان الزمن لسع صبي وكان الليل عقاب شتا وكانت رياح الليل تعربد تمشي بينات النخيل والضفه والموج فى كتال ومافي شي بجرح نعاس الليل باحس الرواويس والمراكب هاربه من برد الشمال ونباح كلاب نص الليالي الصاحيات القمره شالعه على التلال وفانوس يبقبق من علي شباك قديم واطياف حريم متلفعات خايفات من الليل والسديم وألحان بتطلع من حلق وترآ علي وش الفجر مبحوح بعد راح النديم وهواكي بطلع من عبير نفس الشجر من هداة الليل البهيم ومن سواليف السحر ومن ترانيم البحر يفرط عقد أيامي من طبق النسيم يامهره من بر الصحارى الكبرى يم ديسآ مهدل في الكتوف زى غيمه في آخر الليالي زحمه مكاتيب بينى بينك قمر نايم على دفن الدوالى موال على درب النخيل والريح مغارب في شتا البر الشمالى موسم طلاقات الربيع ومدن مسوره باللآلى وأعراس يفج فيها الزغاريد والدلاليك كل ليله على التوالى رمشك مظلات في حمو الشمس المداريه وعيونك طاقه للغنا والسحاب نفسك نسيم ليل الخريف والقبلى شايل في الصعيد بعد اليباب زولك حزين محقن سنين الغربه عمره وعدي خلاهو الشباب قاعد على قهوة محطات العمر يحسب سنين عمره المضن من غير آياب والليل مواكب ضجه والشارع ظلام لاهمسه لاخطوات بتعبر لا كلام غير نهنهات صوت البكا الموجوع بتمرق من شبابيك البيوت آهات تؤثر في العظام بيني ما بينك معاني وكلام حزين ياعمرى ماسووه في كتب الأغانى وهواكى زى نار السلم موقوده في جوفى وحشاى لهلابه والشتا أربعانى بيني ما بينك مصير مسرجات الليل ومركب في رياح موسم مطير صرخه في الجبانه تسرح في حشا الليل الأخير بيني ما بينك وطن غابه للشوق والعصافير والشجن ريح بتمرق من جدار الليل تغربل زى طواحين الزمن
الطال غيابك
وينك أنتى الطال غيابك العيون تسألنى عنك والقليب بيقول حبابك الخطاوى الباكيه ترحل كل يوم واقفات في بابك والأيادى تدور تنقر بس تخاف قسوة عذابك ياوطن لي ناس غلابه يالعيونك للعشق أنهار وغابه زى معابد فيها بتئن الربابه حلوه يوميات مجدده حالمه مابتعرف رتابه صامته زى حزني اللى كاتمو معاى صبابه واحبابك واحباب عينيك حبابا تسقى عمرى الظآمى بى قطرة سحابه وابقى فارس في جبينى تشع مهابه من ضراعى الريد يقطر والعشق مكتوب كتابه يعنى آيه الدنيا ياشمس الضحى ما السنين ياغاليه بكره مروحه والعمر أيامو بتواليني رحى الا يوم سكتك ما بنبرحا
زهرة السوسن
عطرك الفواح للنفوس مسكن قلت ليك طلي وحي لو أمكن قلتي لي لا لا في الربيع أحسن والربيع أهو فات وأنتي ماجيتى وخزنت الساحات وجرحى صحيتى فيها آيه لو يوم جيتى طليتى يا النسيتينا وقلتى ما نسيتي زهرة ألحانى الربيع لوزار خلى يغشاني موسم الأزهار خايفو ينساني
حبان قساى
حبان قساى نسو وعلى قلبى قسو والريح مشت من غير ماتشتهي نفسي واصبحت زى شدرآ سابو الخريف منسى عدمان صفق موحود لا فيهو ضل لا عود الناس تصابح العيد وأنا بالحزن موعود سديت دروب الريح راجي الليالى تعود رسلت ليكم ناس حملتهم اشواق وتحيه من قلبآ لى قلبكم مشتاق وهديه من انسان حساس مشاعرو دقاق ده المن هواكم يوم ماشغلتو الأرزاق
افتقدتك
افتقدتك ياصبا عمرى وشبابى افتقدتك لما زاد الشوق عذابي افتقدتك في غيابى وأغترابي وافتقدت الأبتسامه والعيون الساحره يوم يسحر كلامها وياحبيبة عمرى في الدنيا وزحامها اكتبي لي عن سنينك وكل يوميه بتمر بتزيد حنينك واكتبي لي عن مشاغلك وقولي لي عن اي شي في الدنيا شاغلك واى زول في الدنيا لو سألك عليا قصدو يعرف آيه علاقتك أنتي بيا قولي باكر ايوه راجع جاي ليا
يقولو مشغولة
كلما سألت عليك يقولوا مشغوله آيه شاغلك عنى وريني يازوله مالسكه لي دربك طوالي مقفوله وأن تهت في حبك تبقي انت مسئوله رسلت ليك انسان جاب ليك جواب مني وضحت فيهو كتير وشرحت كيف انى محتاج ومشتاق ليك ياملهمه فنى رد الخطاب ماجاء خيبت لي ظنى ما انت من اهلى ومن جيرتى وناسي شمتى فينى الناس جرحتى احساسي كان العشم ألقاك بس قلبك القاسى حرج على قلبى واجح نفور ناسي
أبوى
أبوى انشاء الله لي تسلم ابوى يالطيب الأنسان ويادراق سيوف الهم حنين كلك سماحه وفال وفيكا مهابة الأبطال والقلب الكبير يا يابه فيهو براءة الأطفال ملان حنيه يا يابه وارادة تفتت الصخره وعامر ديمه بالايمان وزى الوادى في الصحراء تدل التائهه الطشه وتبقى قداحه للضيفان تعشي اللسه ما أتعشى ابوى قادوس سواقى النيل ونخلاتن تهش للدنيا شاربات همبريب الليل سديد رايك أبويا يا أب راى ويالقلبك تملى معاي ومهما اقول عليك من قول أبوى مابيوفى ليك غناي
غربه ومطر
الدنيا ليل غربه ومطر وطرب حزين وجع تقاسيم الوتر شرب الزمن فرح السنين والباقي هداهو السفر ياروح غناى الغربه ملت من شقايا وغربتى وبقيت براى حاضن اساي والوحشه ملت من اسايا وحددتي لاغنوه لا موال يبرد حسرتي غير الشجون يامهلمه الغربه مره ومؤلمه قولو للنيل ضفه ضفه والعشيات لما تصفي والنسيمات البتاخذ من عفاف ريدتنا عفه انو شوقي يفيض بحر شوقي شوق انسان مضيع ضيعو الليل والسهر لا ينابيع ريدى جقت لا ولا اشواقى خفت كل يوم في غربة زايده وبيها كل الدنيا عرفت
المزار
بعد ماعز المزار الليل سهى وملت نجومو الأنتظار والشوق شرب حزن المواويل وانجر خاطر النهار وبقيت اعاين في الوجوه وأسأل عليك وسط الزحام قبال أتوه يمكن الاقي البشبهك مالليل براح والشوق تعالى بيندهك شايلاهو وين والليل معاك عصفوره جنحانا النجوم وأنا بى وراك بسأل عليكى مدن مدن واعصر سلافة الليل حزن وأسأل عليك في المنفي في مرفا السفن يمكن طيوفك أخريات الليل تمر تملا البراحات للحزين طول العمر مانحنا بينا الأمنيات والتضحيه بينا المعزات والعذابات في الحيا بينا الهوى اخلاص على قلب انكوى وكلام قديم قلناهو آخر الليل سوا انو راح نتلاقى لوطال النوى لكن كلامنا الكان وكان خايف يكون شالو الهوى[/size]
محمد معتصم المشرف العام
عدد الرسائل : 174 العمر : 48 الموقع : السودان الخرطوم اوسمه : تاريخ التسجيل : 26/03/2008
موضوع: رد: سيرة تعريفية الشاعر عبدالعال السيد الأربعاء 16 يوليو - 15:08
ابداع يا مخلص ....التحية لشاعرنا عبد العال السيد حمد وهو من شبعانة بحري وشقيق استاذنا الجليل عوض سيد والاخ زميل الدراسة حافظ سيد والتحية لهم وهنيئا لكم وللقولد بهذا المبدع...ومزيدا من الابداع